Äs isch scho lang Vergangeheit,
sit em Gfühl vo äs Bitzeli Freiheit.
Ostersunntig dä perfekti Tag,
wiit und breit kei Niederschlag.
Mir freued üs und hälfed mit
Ballon uspacke Schritt für Schritt.
Zerscht bruchts Luft, ganz viel,
dass mir irgendwänn chömed as Ziel.
Und dänn no Luft ganz heiss,
dä Stefan d’ Mängi ganz gnau weiss.
Hopp is Chörbli alli Gäscht .
Uf zum Heissluft – Ballon - Fahr – Fäscht.
Langsam immer höcher ue.
Ä wunderbari Ussicht und Rueh,
Löwezahnfälder, Säntis, Bodesee,
Sogar da Pilatus und no viel meh.
Jetz chunt än Fluss ischs ächt dä Nil?
Mer gseht wiit und breit kei Krokodil
Dä Stefan klärt und weiss wies isch:
D’ Thur flüsst do dure mit vielne Fisch.
Im Sunneuntergang Richtig Will,
mir chömed nöcher üsem Ziel.
Wo isch do ächt lande sinnvoll?
Das Stefan macht das eifach toll!!
Ä Punktlandig ufe eme Strössli chli.
Zämepackt isch dänn sehr gli.
Mir sind beidruckt vo dim Könne.
Ässe und Trinke tuesch du üs dänn gönne.
Mir händ gnosse die ganzi Fahrt
und dini unkompliziert, fründlich Art.
Caroline und Andreas Rutishauser
